– శ్రీ సుబుధేంద్ర తీర్థ స్వామీజీ చేతుల మీదుగా భూమి పూజ
– బెంగళూరుకు చెందిన మదన్ పాటిల్ రూ.25 లక్షల విరాళం
విజేత, మంత్రాలయం : మంత్రాలయ పుణ్యక్షేత్రంలో ప్రతిష్టాత్మకంగా చేపట్టనున్న రాఘవ సరోవర ప్రాజెక్టు భూమి పూజ కార్యక్రమం ఈరోజు ఘనంగా జరిగింది. శ్రీ రాఘవేంద్ర స్వామి దివ్య ఆశీస్సులతో, శ్రీ మఠం పీఠాధిపతులు పరమపూజ్య శ్రీ సుబుధేంద్ర తీర్థ స్వామీజీ మార్గదర్శకత్వంలో ఈ కార్యక్రమం నిర్వహించారు.మంత్రాలయ పవిత్ర పరిసరాల్లో సుమారు 25 ఎకరాల విస్తీర్ణంలో ఈ ప్రాజెక్టును చేపట్టనున్నారు. ప్రకృతి అందాలు, పచ్చదనంతో కూడిన అందమైన మానవ నిర్మిత సరస్సును, ప్రకృతి పరిరక్షణ, పర్యావరణ అవగాహన, ప్రజా శ్రేయస్సును పెంపొందించే వసతులతో దీనిని తీర్చిదిద్దనున్నారు.ఈ కార్యక్రమానికి శ్రీ రాఘవేంద్ర స్వామి మఠం పీఠాధిపతి పరమపూజ్య శ్రీ సుబుధేంద్ర తీర్థ స్వామీజీ విచ్చేసి ఆశీర్వదించారు.ఈ సందర్భంగా బెంగళూరుకు చెందిన మదన్ పాటిల్ రాఘవ సరోవర ప్రాజెక్టుకు రూ.25 లక్షల విరాళాన్ని అందజేసి తమ వంతు సహకారం అందించారు.ఈ కార్యక్రమానికి డా. సి.ఎస్. మంజునాథ్ ముఖ్య అతిథిగా హాజరయ్యారు. పలువురు ప్రముఖులు, శ్రేయోభిలాషులు, భక్తులు పాల్గొన్నారు.రాఘవ సరోవర ప్రాజెక్టు మంత్రాలయ పుణ్యక్షేత్రానికి మరో మణిహారంగా నిలవనుందని, భక్తులకు, సందర్శకులకు ప్రశాంతమైన ప్రకృతి వాతావరణాన్ని అందించడంతో పాటు పుణ్యక్షేత్ర అందాన్ని మరింత ఇనుమడింపజేయనుందని నిర్వాహకులు తెలిపారు.
