విజేత,పాపన్నపేట : తెలంగాణ సంస్కృతి సంప్రదాయాలకు ప్రతీకగా నిలిచే బతుకమ్మ ఉత్సవాలలో భాగంగా శుక్రవారం మెదక్ పట్టణం శ్రీ నల్లపోచమ్మ కాలనీ బతుకమ్మ చౌక్ ప్రధాన చౌరస్తాలో అట్ల బతుకమ్మ వేడుకలు అంబరాన్నంటాయి. బతుకమ్మ మహాసంబరాలు కన్నులపండువగా సాగాయి. రంగురంగుల పూలతో పేర్చిన బతుకమ్మలు, మహిళల ఉత్సాహభరితమైన ఆటపాటలు, ఉయ్యాల పాటలు, కోలాటాలతో చౌరస్తా పూలవనాన్ని తలపించింది.

తెలంగాణ ఆడబిడ్డల ఆత్మీయతకు, ప్రకృతితో ముడిపడిన మన సంస్కృతికి అద్దం పట్టేలా ఈ వేడుకలు సాగాయి. కాలనీ మహిళలు తరలివచ్చి, తమ సృజనాత్మకతను ప్రతిబింబించేలా అందమైన బతుకమ్మలను పేర్చి తీసుకువచ్చారు. తంగేడు, గునుగు తదితర రంగురంగుల పూలతో అలంకరించిన బతుకమ్మలు ప్రాంగణమంతా పండుగ శోభను నింపాయి. అత్యంత భక్తిశ్రద్ధలతో మహిళలు, చిన్నారులు ఉత్సాహభరితంగా బతుకమ్మ ఆటలు ఆడారు.