భారీగా కలప నిల్వలు.. అనుమతులు, రవాణా వివరాలపై ప్రశ్నలు

నిబంధనలు ఉల్లంఘిస్తే చర్యలు తప్పవన్న అధికారులు.. తనిఖీలు మాత్రం ఎక్కడ?

కట్టె మిషన్‌ వ్యవహారంపై సమగ్ర విచారణకు స్థానికుల డిమాండ్‌

విజేత,పెద్ద శంకరంపేట్: పెద్ద శంకరంపేట్ పట్టణ పరిధిలో ఓ కట్టె మిషన్‌ నిర్వహణ తీరుపై తీవ్ర చర్చ జరుగుతోంది. కట్టె మిషన్‌ పరిసరాల్లో భారీగా కలపను నిల్వ ఉంచి కార్యకలాపాలు కొనసాగిస్తున్నప్పటికీ సంబంధిత అధికారులు పట్టించుకోవడం లేదన్న ఆరోపణలు స్థానికుల నుంచి వినిపిస్తున్నాయి. నిబంధనలకు అనుగుణంగా కట్టె మిషన్‌ నిర్వహిస్తున్నారా? కలప నిల్వలు, రవాణాకు సంబంధించిన పత్రాలు సక్రమంగా ఉన్నాయా? అనే ప్రశ్నలు ఇప్పుడు తెరపైకి వస్తున్నాయి.

అధికారులంటే లెక్కలేదా..?

స్థానికుల కథనం ప్రకారం.. కట్టె మిషన్‌ యజమాని అధికారులపై ధీమాగా వ్యవహరిస్తున్నారనే ఆరోపణలు ఉన్నాయి. “నన్నెవరూ ఏమీ చేయలేరు.. నా వెనుక బడా నాయకుడు ఉన్నాడు” అంటూ ఆయన చెప్పుకుంటున్నారని స్థానికంగా ప్రచారం జరుగుతోంది. ఈ ప్రచారంలో వాస్తవమెంత? రాజకీయ అండదండలు ఉన్నాయా? అన్నది అధికారుల విచారణలో తేలాల్సి ఉంది.

భారీగా కలప నిల్వలు.. ఎక్కడి నుంచి?

కట్టె మిషన్‌ వద్ద పెద్ద మొత్తంలో కలప దుంగలు, కట్టెలు నిల్వ ఉంచిన దృశ్యాలు కనిపిస్తున్నాయి. ఇంత భారీగా కలపను ఎక్కడి నుంచి తీసుకువచ్చారు? వాటి కొనుగోలు, రవాణాకు సంబంధించిన ధ్రువపత్రాలు ఉన్నాయా? కలప రవాణా నిబంధనలు పాటిస్తున్నారా? అన్న అంశాలపై సంబంధిత శాఖలు దృష్టి సారించాల్సిన అవసరం ఉంది.కేవలం కట్టె మిషన్‌ అనుమతులు ఉన్నాయా లేదా అన్నదే కాకుండా.. నిల్వ చేస్తున్న కలపకు చట్టబద్ధమైన ఆధారాలు ఉన్నాయా? రవాణా సమయంలో అవసరమైన అనుమతులు తీసుకున్నారా? మిషన్‌ నిర్వహణలో పర్యావరణ, అగ్నిమాపక, స్థానిక సంస్థల నిబంధనలు పాటిస్తున్నారా? అన్న కోణాల్లోనూ అధికారులు పరిశీలించాల్సిన అవసరం ఉంది.

చర్యలు ఎందుకు కనిపించడం లేదు?

స్థానికంగా ఇలాంటి ఆరోపణలు వినిపిస్తున్నప్పటికీ సంబంధిత అధికారులు ఇప్పటివరకు క్షేత్రస్థాయిలో తనిఖీలు నిర్వహించారా? నిర్వహించి ఉంటే ఏం గుర్తించారు? నిబంధనలకు విరుద్ధంగా ఏమైనా ఉంటే ఎలాంటి చర్యలు తీసుకున్నారు? అనే ప్రశ్నలకు సమాధానాలు లేవని స్థానికులు అంటున్నారు.అధికారులు కేవలం ఫిర్యాదులు వచ్చిన తర్వాత స్పందించడం కాకుండా.. పట్టణ పరిధిలో నిబంధనలకు విరుద్ధంగా నడుస్తున్నట్లు అనుమానం ఉన్న కట్టె మిషన్లను తనిఖీ చేసి రికార్డులను పరిశీలించాలని ప్రజలు కోరుతున్నారు.

రాజకీయ అండ ఉందా..? విచారణతోనే తేలాలి

కట్టె మిషన్‌ యజమాని వెనుక బడా రాజకీయ నాయకుడి అండ ఉందన్న ప్రచారం ప్రస్తుతం స్థానికంగా చర్చనీయాంశంగా మారింది. అయితే ఇది నిర్ధారిత విషయం కాదని, కేవలం స్థానికంగా వినిపిస్తున్న ఆరోపణ మాత్రమేనని స్పష్టత అవసరం. సంబంధిత అధికారులు స్వతంత్రంగా విచారణ చేపట్టి వాస్తవాలను వెల్లడిస్తేనే ఈ ప్రచారానికి తెరపడనుంది.

కలప నిల్వలపై ప్రత్యేక దృష్టి పెట్టాలి

అనుమతులు, కలప రవాణా పత్రాలు, నిల్వల వివరాలు, కట్టె మిషన్‌ నిర్వహణకు సంబంధించిన అనుమతులను అధికారులు సమగ్రంగా పరిశీలించాలని స్థానికులు కోరుతున్నారు. నిబంధనలు ఉల్లంఘించినట్లు తేలితే సంబంధిత వ్యక్తులపై చట్టప్రకారం చర్యలు తీసుకోవాలని డిమాండ్‌ చేస్తున్నారు.