420 హామీల అమలులో కాంగ్రెస్ ప్రభుత్వం విఫలం: వీరారెడ్డి నరేందర్ రెడ్డి

విజేత, కుత్బుల్లాపూర్: కాంగ్రెస్ ప్రభుత్వం 1000 రోజుల పాలనలో ఎన్నికల సమయంలో ప్రజలకు ఇచ్చిన హామీలను అమలు చేయడంలో విఫలమైందని ఆరోపిస్తూ బీఆర్‌ఎస్ పార్టీ ఆధ్వర్యంలో కుత్బుల్లాపూర్‌లో భారీ ధర్నా నిర్వహించారు. బీఆర్‌ఎస్ వర్కింగ్ ప్రెసిడెంట్ కేటీఆర్ పిలుపు మేరకు, స్థానిక ఎమ్మెల్యే కేపీ. వివేకానంద, ఎమ్మెల్సీ శంభీపూర్ రాజు ఆధ్వర్యంలో గురువారం కుత్బుల్లాపూర్ తహసీల్దార్ కార్యాలయం ఎదుట ఈ నిరసన చేపట్టారు.ఈ కార్యక్రమంలో జీడిమెట్ల 132వ డివిజన్ బీఆర్‌ఎస్ సీనియర్ నాయకులు వీరారెడ్డి నరేందర్ రెడ్డి పాల్గొని ప్రజా సమస్యలపై ప్రభుత్వాన్ని నిలదీశారు. అనంతరం ప్రజా సమస్యల పరిష్కారం కోరుతూ తహసీల్దార్ అధికారికి వినతిపత్రం సమర్పించారు.ఈ సందర్భంగా వీరారెడ్డి నరేందర్ రెడ్డి మాట్లాడుతూ.. ఎన్నికల సమయంలో కాంగ్రెస్ పార్టీ ప్రజలకు ఇచ్చిన హామీలను అమలు చేయడంలో ప్రభుత్వం విఫలమైందని విమర్శించారు. అర్హులైన పేదలకు డబుల్ బెడ్‌రూమ్ ఇళ్లను వెంటనే కేటాయించాలని, అర్హత కలిగిన కుటుంబాలకు ఇందిరమ్మ ఇళ్లు మంజూరు చేయాలని డిమాండ్ చేశారు.అదేవిధంగా 22-A భూముల సమస్యను తక్షణమే పరిష్కరించి, ఏళ్ల తరబడి ఇబ్బందులు పడుతున్న బాధితులకు న్యాయం చేయాలని కోరారు.

“ప్రజా సమస్యలపై పోరాటం కొనసాగిస్తాం”

వీరారెడ్డి నరేందర్ రెడ్డి మాట్లాడుతూ,“ఎన్నికల సమయంలో ప్రజలకు ఇచ్చిన 420 హామీలను అమలు చేయకుండా కాంగ్రెస్ ప్రభుత్వం ప్రజలను మోసం చేస్తోంది. డబుల్ బెడ్‌రూమ్ ఇళ్ల కోసం ఎదురుచూస్తున్న అర్హులైన పేదలకు వెంటనే ఇళ్లు కేటాయించాలి. అర్హులైన కుటుంబాలకు ఇందిరమ్మ ఇళ్లు మంజూరు చేయాలి. 22-A భూముల సమస్యకు శాశ్వత పరిష్కారం చూపి బాధితులకు న్యాయం చేయాలి.ప్రజా సమస్యల పరిష్కారం కోసం బీఆర్‌ఎస్ పార్టీ చేస్తున్న పోరాటం నిరంతరం కొనసాగుతుంది. ప్రభుత్వం వెంటనే స్పందించి సమస్యలను పరిష్కరించకపోతే ప్రజల తరఫున మరింత ఉధృతంగా ఉద్యమాలు చేపడతాం” అని స్పష్టం చేశారు.ప్రజా సమస్యలపై ప్రభుత్వం తక్షణమే స్పందించి పరిష్కార చర్యలు చేపట్టాలని బీఆర్‌ఎస్ నాయకులు డిమాండ్ చేశారు. సమస్యలను పరిష్కరించడంలో ప్రభుత్వం నిర్లక్ష్యం వహిస్తే ప్రజల తరఫున మరిన్ని ఉద్యమాలు, నిరసన కార్యక్రమాలు చేపడతామని హెచ్చరించారు.