- కొమ్మేపల్లి భూసేకరణలో మహమ్మద్ ముంతాజ్ అన్సారీకి పరిహారం ఇంటి స్థలం

- ఆర్‌టీఐ ఆధారాలతో అర్హతను నిరూపించిన యాదాల శ్రీనివాస్ కు కృతజ్ఞతలు తెలిపిన ఇమామ్

- 258 మంది జాబితాలో 29 పేర్ల తొలగింపుపై ప్రశ్నలు

- ప్లాట్ల వ్యవహారంపైనా ఆరోపణలు!

విజేత, సత్తుపల్లి: సింగరేణి భూసేకరణలో ఆర్‌అండ్‌ఆర్ ప్రయోజనాల కోసం దాదాపు ఎనిమిదేళ్లుగా ఎదురుచూస్తున్న కొమ్మేపల్లి మసీదు ఇమామ్ మహమ్మద్ ముంతాజ్ అన్సారీకి ఎట్టకేలకు ఊరట లభించింది. తనకు ఆర్‌అండ్‌ఆర్ పరిహారంతో పాటు ఇంటి స్థలం కూడా మంజూరైందని ఆయన తెలిపారు. మసీదు సమీపంలోనే స్థలం కేటాయించడంతో ఆనందం వ్యక్తం చేశారు.తాను 2016 నుంచే ఆర్‌అండ్‌ఆర్ ప్యాకేజీకి అర్హుడినని, అయితే తన పేరు డబ్ల్యూపీ 1174/2021లో చేరిన నేపథ్యంలో సమస్యలు ఎదురయ్యాయని ముంతాజ్ అన్సారీ పేర్కొన్నారు. తన అర్హతకు సంబంధించిన సమాచారాన్ని ఆర్‌టీఐ ద్వారా సేకరించి అధికారుల దృష్టికి తీసుకెళ్లడంలో సామాజిక కార్యకర్త యాదాల శ్రీనివాస్ సహకరించారని తెలిపారు. కులమత భేదాలు లేకుండా తనకు అండగా నిలిచిన శ్రీనివాస్‌కు కృతజ్ఞతలు తెలిపారు.

*ఆర్‌అండ్‌ఆర్‌లో అసలు ట్విస్ట్ ఇదేనా?*

ముంతాజ్ అన్సారీకి ప్రయోజనాలు అందడంతో పాటు కొమ్మేపల్లి ఆర్‌అండ్‌ఆర్ వ్యవహారంలోని పాత వివాదాలు మరోసారి తెరపైకి వచ్చాయి. 2016లో అప్పటి ఖమ్మం జిల్లా కలెక్టర్ 258 మందిని అర్హులుగా గుర్తించినట్లు గ్రామస్తులు పేర్కొంటున్నారు. అనంతరం 29 మంది పేర్లు జాబితా నుంచి తొలగించబడ్డాయనే ఆరోపణలు ఉన్నాయి.నోటీసులు ఇవ్వకుండా 29 మంది పేర్లు ఎందుకు తొలగించారు?తొలగించిన వారిలో 12 మందినే ఎందుకు సిఫారసు చేశారు?మిగిలిన వారి అర్హతను ఎందుకు పరిగణనలోకి తీసుకోలేదు?అనే ప్రశ్నలు స్థానికంగా వినిపిస్తున్నాయి. ఈ ప్రక్రియ వెనుక కొందరి ప్రమేయం ఉందనే ఆరోపణలు కూడా ఉన్నప్పటికీ, వాటిపై అధికారిక నిర్ధారణ కావాల్సి ఉంది.

*12 మంది అర్హతపై విచారణ.. నివేదికలో ఏముంది?*

డబ్ల్యూపీ 1174/2021లోని 12 మంది అర్హతపై ఫిర్యాదు రావడంతో అప్పటి జిల్లా కలెక్టర్ ఆదేశాల మేరకు భౌతిక విచారణ జరిగినట్లు గ్రామస్తులు చెబుతున్నారు. సంబంధిత రెవెన్యూ రికార్డులు, నివాస వివరాలు తదితరాలను పరిశీలించిన అనంతరం వారు అర్హులు కారని నివేదిక సమర్పించినట్లు పేర్కొంటున్నారు.ఈ విచారణ వివరాలు, సంబంధిత రికార్డులు పూర్తిస్థాయిలో ప్రజలకు వెల్లడించాలనే డిమాండ్ కూడా వినిపిస్తోంది.

*ప్లాట్లపై ఆరోపణలు.. అధికారుల స్పందన ఏంటి?*

కొమ్మేపల్లి ఆర్‌అండ్‌ఆర్ సెంటర్‌లో అర్హుల కోసం కేటాయించిన ఖాళీ ఇంటి స్థలాలపై కూడా వివాదం కొనసాగుతున్నట్లు గ్రామస్తులు చెబుతున్నారు. 84, 96, 101, 110, 112, 136, 146, 178, 183, 210, 217, 227 నంబర్ల ప్లాట్లపై ఆక్రమణ ఆరోపణలు ఉన్నాయని పేర్కొంటున్నారు.విచారణ జరిపి ఆక్రమణలు ఉంటే స్థలాలను రికవరీ చేయాలని ఫిర్యాదులు చేసినట్లు చెబుతున్నారు. ఈ అంశంపై సంబంధిత అధికారులు స్పష్టమైన వివరాలు వెల్లడించాల్సి ఉంది.

*ఇమామ్‌కు న్యాయం జరిగింది.. మిగిలిన ప్రశ్నలకు సమాధానాలెప్పుడు?*

మహమ్మద్ ముంతాజ్ అన్సారీకి ఎనిమిదేళ్ల తర్వాత ఆర్‌అండ్‌ఆర్ పరిహారం, ఇంటి స్థలం దక్కడంతో ఒక వివాదానికి పరిష్కారం లభించినా.. కొమ్మేపల్లి ఆర్‌అండ్‌ఆర్ వ్యవహారంలో 29 మంది పేర్ల తొలగింపు, 12 మంది అర్హత, ప్లాట్లపై వచ్చిన ఆరోపణలు మాత్రం ఇంకా ప్రశ్నలుగానే మిగిలాయి.ఈ అంశాలపై సమగ్ర విచారణ జరిపి, అర్హులైన నిర్వాసితులందరికీ న్యాయం చేయాలని గ్రామస్తులు కోరుతున్నారు.